Гурбан Гурбанов: «Қайрат» жақсы қорғанып, қарсы шабуылға иек артады»
«Карабахтың» бас бапкері ертеңгі ойынның екі команда үшін де маңызды екенін айтты.
Әзірбайжандық «Карабахтың» бас бапкері Гурбан Гурбанов Конференциялар лигасы топтық кезеңінің үшінші турында алматылық «Қайратқа» қарсы өтетін ойын туралы пікір білдірді, деп хабарлайды AzeriSport порталы:
– Біз бұл ойынға жақсы дайындықпен келдік. Жауапкершілік сезімі артып келеді. Бұл ойынның нәтижесі өте маңызды, себебі бұл кезеңде әрбір ұпай өте маңызды. Қарсылас, мен көріп тұрғандай, ойынға өте байсалды көзқараспен қарайды. Мен олардың «Базельмен» болған матчын көрдім (2:4). Қорытынды есеп ойынның барысын көрсетпей, бізді алдауы мүмкін. 0:4-тен кейін қонақтар есепті теңестіруі мүмкін еді. Оларда тәжірибелі ойыншылар жеткілікті. Шабуыл шебіндегі мүмкіндіктері жоғары. Біз жеңгіміз келеді және бұл үшін бар күшімізді саламыз. Мен өз ойыншыларыма сенемін.
– Ертеңгі матч «Базельге» қарсы ойынға қарағанда қарқыны жағынан төмен бола ма?
– «Қайраттың» басқаша футбол ойнайды. Олар жақсы қорғанып, қарсы шабуылға шығады. Біз қорғаныста абай болуымыз керек. Шыдамдылық танытып, асықпауымыз керек. Әр секунд сайын концентрацияны жоғалтпауымыз тиіс. Біз ойын қарқынын арттыруға тырысамыз.
– Құрбан Бердыевтің біздің футболды білуі сіздің міндеттеріңізді қаншалықты қиындатады?
– Мен әріптесімді құрметтеймін. Ол Ресейде табысқа ие болды, оның тәжірибесі мол. Менің онымен жеке таныстығым жоқ, бірақ оның ешбір матчқа жеңіл қарамайтынын естідім. Оның командасы кіммен ойнаса, ол үшін маңызды матч болып саналады. Біз тәжірибелі бапкердің командасымен кездесеміз. Сондықтан абай болуымыз керек.
– Неге соңғы жаттығуды Тофик Бахрамов атындағы стадионда өткізбейсіз?
– Алаң жақсы көрініп тұр. Егер екі команда да осы жерде жаттығатын болса, олар көгалдың сапасын бұзуы мүмкін. Көгал жақсарып келеді. Мен бәрі жақсы болады деп күтпедім, бірақ ол әлі толық дайын емес.
– «Қайрат» аптаның соңында «Астанамен» принципиалды ойын өткізеді...
– Менің ойымша, олар келесі ойын туралы ойламайды. Футболда ондай нәрсе жоқ. Сонымен қатар олар үшін бұл кездесу маңызды емес, өйткені олар чемпиондыққа деген мүмкіндігін жоғалтып алды. Ертеңгі кездесу біз үшін де, олар үшін де маңызды.
– «Карабах» биылғы маусымда жеңілістің не екенін білмей келеді. Бұл командаға қысым жасамай ма?
– Мен бұл туралы айтпаймын, бұл мені алаңдатады. Бір жағынан, мен бұған қуаныштымын. Мен біздің команда туралы жақсы сөздер естимін. Бірақ екінші жағынан, кейбір сәттерде командаға қысым жасалады. Біздің қашан жеңілетініміз туралы ойлар пайда болады. Бұл туралы неғұрлым көп жазылса, бізге соншалықты ауыр тиеді.
