«Ақтөбе» «Ордабасының» бұрынғы футболшысына қызығушылық танытуда

Футболшы Қазақстанға қайта оралуға қарсы емес.

Meta-ratings.kz сайтына белгілі болғандай, «Ақтөбе» «Тузла» клубының жартылай қорғаушысы Мирзад Механовичке көз тігіп отыр.

28 жастағы босниялық футболшы Қазақстанда «Ордабасы» клубының намысын қорғады. 3 маусым бойы шымкенттік клуб үшін 80 кездесу өткізіп, 9 гол мен 21 нәтижелі пасты өз атына жазды. Бірақ жазда қаржылық қиындықтарға байланысты клубтан кетіп, босниялық «Тузламен» үш жылдық келісім-шартқа отырды. Дегенмен, тиімді ұсыныс түссе, Мирзад бұл командадан өтемақысыз кете алады.

Механович Владимир Мұхановтың ойын философиясына жақсы сәйкес келеді. Дегенмен, келіссөздер барысында біртүрлі жағдайлар орын алып жатыр: футболшы жағы ауысуға дайын, Механовичтің өзі де «Ақтөбеге» қосылуға қарсы емес. Бірақ клуб өкілдері екі топқа бөлінуде - ойыншыны шынымен де көргісі келетіндер бар, бірақ бұл келісімді өз талаптарына сай жасағысы келетін агенттер де жоқ емес. Енді соңғы шешімді «Ақтөбенің» бас бапкері Владимир Мұханов қабылдайтын болады.