Магомед Адиев: «Біз мұнда қазан, қараша айындағы қиындықтарға қарамастан, үлкен мотивациямен келдік»
Ертеңгі матчқа «Шахтердің» бірнеше ойыншысы қатыспауы мүмкін.
«Шахтер» командасының бас бапкері Магомед Адиев Қазақстан кубогінің финалында «Қайратқа» қарсы өтетін матч жайлы пікір білдірді, сондай-ақ БАҚ өкілдерінің науқас футболшылар мен қаржы мәселесі туралы сұрақтарына жауап берді.
– Бір-екі күн бұрын командада науқас ойыншылардың бар екені белгілі болды. Сіз бұл ақпаратқа түсініктеме бере аласыз ба? Ойыншыларыңыздың жағдайы қалай?
– Алдарыңызда сол науқастың бірі отыр. Шынында да, бізде ЖРВИ-ге байланысты мәселелер бар. Бұл туралы егжей-тегжейлі айтқым келмейді. Бізде ертең алғашқы минуттардан бастап алаңға шығу тиіс бірнеше ойыншылар бар, бірақ олардың бұл ойынға қатысуы әлі де күмәнді болып тұр. «Қайрат» екі күн бұрын ғана ойын өткізді. Ал бізде бір апталық үзіліс болды, бірақ осы уақытты пайдаланып, жақсы дайындалдық. Ертең таңертең негізгі құрам туралы шешім қабылдайтын боламыз.
– Келесі жылдан бастап футбол клубтарының бюджеті айтарлықтай қысқарады. Бұл «Шахтерге» қалай әсер етеді?
– Біріншіден, «Шахтерде» биыл да супербюджет болған жоқ деп есептеймін. Бізде қаржыландыруға қатысты мәселелердің бар екенін бәріңіз жақсы білесіздер. Кейбір сарапшылардың айтуынша, қазақстандық командалардың жартысы жалақы төлеуде қиындықтарға тап болған. Міне, мен осыған қатысты өз ойымды айтқым келеді. Осындай жағдайға тап болған командалардың қазан айын қалай өткізгенін қарап көріңіз. Оларда мотивация болған жоқ. Біз жеңген командалардың киім ауыстыратын бөлмедегі жағдайы қандай болды және олар қалай ойнады? Олар тек алаңда уақыт өткізді. Біз мұнда қазан, қараша айындағы қиындықтарға қарамастан, үлкен мотивациямен келдік. Біздің киім ауыстыратын бөлмеміздегі атмосфера жоғары деңгейде. Бұл жағынан еш қиындық болған жоқ. Менің ойымша, біз команда ретінде бұл тұрғыда өте күштіміз және мұны чемпионат бойы дәлелдедік.
Болашаққа көз жүгіртсек, бұл үлкен мәселе болып көрінеді. Ресейдегідей футболдағы белгілі бір гонорарлар төмендесе, ол елде бұл спорт түрі бірден құлдырайды. Менің ойымша, биыл ең нашар жағдай ретінде Франция құрамасына қарсы ойындағы нәтиже (0:8) тіркелді. Ал оған дейін «Шахтер» еурокубок бәсекесінде жақсы ойнады, егер «Маккабиге» қарсы ойын алдында бізде еш қиындық болмаса, өз алаңымызда олардан жеңілмес едік. Осы 8 минут ішінде біз кейбір қаржылық нюанстарымызға тым көп эмоция жұмсап қойдық. Мемлекеттің қаржыландыруы төмендесе, әрине, еуропалық жарыстар мен ұлттық құрамадағы нәтиже одан да бетер төмендейді.
– Клуб басшылығы сізбен гонорар туралы сөйлесті ме?
– Әңгіме жалғасуда. Бүгінде мұның қалай болатынын басшылардың өздері де толық білмейді. «Шахтер» бұдан да күшті болуы үшін келесі жылы біраз демеушілер тартуға тырысады. Желтоқсанда жағдайдың қалай өрбитінін байқап көреміз.
– Егер жалақыңыз қысқартылса, клубта қаласыз ба?
– Түсінесіз бе, мен осында келіп, клуб президенті менімен келіссөздер жүргізіп жатқанда, ол менің жеке келісім-шартымды талқылауға дайын екенін айтты. Мен оған жеке келісім-шартым бірқатар трансферлерге байланысты болады деп жауап бердім. Бұл команданы бірінші рет көргенде, басшылық трансферге көмектеспесе, мен де ештеңеге көмектесе алмайтынымды бірден айттым. Президент келісті. Ал басқа мәселелер туралы келісу қиын болған жоқ.
Жағдайды өзгертіп, ФНЛ-дан кеткім келді. Жаттықтырушы ретінде өзіме жаңа міндет қойдым. Ертең өте маңызды матч күтіп тұр. Барлығы мотивацияға және клуб жетекшілерінің не қалайтынына байланысты болады.
– «Қайрат» соңғы ойында жүйені өзгертіп, үш шабуылшымен ойнады. Ертең осы трио шықса, оларды тоқтату туралы жоспарыңыз бар ма? Әлде «Шахтер» әдеттегідей футбол ойнай ма?
– Әрине, дайындалып жатырмыз. Олар басқаша ойнайды. «Қайратқа» қарсы матчта жақсылап қорғану керек. «Қайрат» еркін аймақтарда ойнағанды ұнатады, әсіресе осындай тәжірибелі әрі жылдам үш шабуылшымен. Тіпті біздің алаңда өткен ойында да олар бірқатар қиындықтар туғызды. Және, әрине, стандарттар. Бұл олардың футболында негізгі рөл атқарады. Біз мұны бәріміз түсінеміз және оған қарсы қолданатын әдістерді дайындауға тырысамыз.
– Сіз Ресейден келген адам ретінде Қазақстан чемпионаты мен ФНЛ, РПЛ-дағы деңгейді салыстыра аласыз ба?
– Қазақстан құрамасын ескере отырып, чемпионатты әлсіз деп айтпас едім. Қазақстан чемпионатында көшбасшылармен, әсіресе, өз алаңында ойнайтын оңтүстіктегі командалармен болатвн әр матчта қиындықтар туындайды. Бұл матчтар әрқашан ерекше сипатқа ие болады. Мен осында ойыншы ретінде өткізген уақытпен салыстырсам, Қазақстан футболы алға жылжыды, керемет жаттықтырушылар келді. Ертеңгі қарсыласымызды Құрбан Бердыевтың алып шығуының өзі көп нәрсені аңғартады.
Ресей біріншілігімен салыстыратын болсақ, ол жерде де чемпионатты сынап жатады. Еурокубок мен ұлттық құрама айна секілді. Біз олардың нәтижелеріне өте тәуелдіміз.
